خيال .. وجهك وصوفه *** فوق الخيال
جمال .. روحك أشوفه *** تاج الجمال
لو أبذل جهدي *** و تتعب أفكاري
وصفك يالمهدي *** حيّر أشعاري
أنا الحب مو طرب عندي *** وحبيبي يفهم شقصدي
ورثته من أبوي اللي *** ورث كل نبضه من جدي
فما بالك إذا المحبوب *** أعز من كل هلي عندي
شقول بروعته وحسنه *** حبيبي ودنيتي المهدي
بس حروف إسمه *** انحفرت بضلوعي
من أكتب كلمة *** محتها دموعي
محال .. أقدر أعوفه *** بلحظة محال
لكل من يشعر بغربة *** ويقول أني عفت دربه
يحبني ويطلب أشواقي *** وعلى قلبي عتب قلبه
أقول أشتعتب اعليه *** وأنا القربه مهو بقربه
ترى المهدي أخذ قلبي *** وأخذ كل شوقه وحبه
آنا اللي جروحه *** بصدره يآويها
والمهدي بروحه *** هو يداويها
زلال .. روحه الهنوفة *** ترمي الزلال
أشوفه بشاشة أحلامي *** قمر يتمشى قدامي
وأحاول ألمس أجدامه *** أخر وترعش أجدامي
أناظر له وأنا معجب *** ويثور إحساسي وإلهامي
وإذا جيت أوصفه بنظره *** تذوب أوراقي وأقلامي
قام يذوّبني *** نظراته وطيفه
هو اليكتبني *** ويمسحني بكيفه
حلال .. روحي بكفوفه *** لو راحت حلال
تخيل غايب ويسحر *** خياله الوحده بس يبهر
أخاف يطل من إغيابه *** وعليه عيوني ما تقدر
إذا هو مختفي ونوره *** رهيب الطلة والمنظر
بعد عيني شيقدرها *** على نوره إذا يظهر
أطمح يقبلني *** بكره من أنصاره
خايف يقتلني *** حدة أنواره
كمال .. بس قلبي خوفه *** يسيح من الكمال
